مساااااااااادير,,,,,,,,,,,,كل يوم مسدار ونمة

داك العـام وكانت صيفه حـــرها لاهب
فوق ضهري الحمول متزايده كلها واجـب
قال ليا الرفيق( هج ) قتلو تب ماك صاحب
كيف المتلي يرحل ؟ قالي فيها مكاســب
**
قفيت من ربــوع امدر ركبت الكبـري
عين في النيل وعين تحسب كهارب بحري
يا الطياره رزمك حاكى رزمـــة صدري
طيـــري على الخليج قبال يلجلج صبري
**
طارت واقلعــت من المطــار متهادره
من فوق السحاب شفت البيوت متصـاغره
كرجت الضروس يانفسي خليك صــابره
شن خلاك تطيري وكنت لازمــه الجابره

ألكانما الامــرَّ من الصــــــبر والمر
ما كنت انجــــــبرت بعدت من ام در
حـار بالحيـل فراق وطني وشوارعــو الغر
و احر من البعد والشوق، هــــوان الحـر
**
يا بحـر الخليج ساحلك شواني رطوبــه
رملك صـر جمــر فوقـو الشمس مقلوبه
زيتــك والمدن وجنـاينــك المجـلوبه
ما بتوزن ولا اااا في امبده ضـل راكوبـه
**
ساكت بهرجــه وصورن على الشاشــات
كمبـو، بـــدل خيـم ساوينو في بنايـات
لا حـي لا فريـــق لا عرشـــن غيمات
لا ضــــل لا نهـــر لا عيـد ولا لمات
**
**
سب من هـــادي عيشه وسب بلاد الغير
ما بعــدك وطن يا وطـــني فيك الخير
يااب نيلين سـلام ، بوب ـ يا مـلاذ الطير
من نوبـه وعـرب وادروب وفـور ونوير
**
تبـــــرا من الجـروح يا نسجة الرحمن
سواك من خيــوط ألسن عفـاف ، والوان
كــاكاو باللبن ـ وللا العسـل في جران
يا جــوقة نشيد بي جمــلة الألحــان
**
تسلمي لينـــــا لا مقطـــوعه لا ممنـوعه
يا فاكهـــة بلاد الله الجميع مجمـــــــوعه
طول النيل وعرض الضفتيـــــن مـزروعه
ما ناقصـــك سوى رايـــة ســلام مرفوعه
**
إيمـــــانك قديم بي كل دين بتصــلي
وفي وادي الشـــــعر بي كل لسان تتجلي