مساااااااااادير,,,,,,,,,,,,كل يوم مسدار ونمة

كترو لينا من المسادير والنمات خلاص ملينا اللغه العصريه احسن نقيل كل يوم فى راكوبة عضو نشرب فنجان قهوه ولازم يكرمنا بمسدار
انا التوب البهيج الباهى زيقو
انا فرج العيال وكتين يضيقو
انا الدابى ان لبد للزول يعيقو
وانا المامون على بنوت فريقو
وكمان مسدار
ان مال الشدر مابتكسرن فراعو
وفمحان للطلب للمابجيبو ضراعو
ليه يااهلنا للبيناتنا مابتراعو
القال راسى يوجعنى يربطولو كراعو

مرحب بيك الاخت وصال فى راكوبتنا وهمبريبنا الحلو دة وبنتمنى إنك تتواصلى معانا بى نمك ومساديرك

مواصلين فى درقة الرغوة
خيرك مابيدوم ياالبهرج الغشاشة
يا مطر المنية الديمة سابقة رشاشة
كم قصراً جميل انواره تضوى بشاشة
دمرتيه اصبح فاقد المقشاشة

اللخَـــــــدَر عَـنَانِيف الـجَـــــــري الـنُّدَّارْ
جَنْ جَارْيَاتْ ورَاكْ دَايْرَاتْ خَلاسْ التَّارْ
وَكْتَينْ جَرَنْ وَصَلَنْ مِيسْ العِنَـــــادْ الحَـارْ
جِيتْ وَشَّكْ خَلاَ وضَهَرَكْ وَرَاهُــــو كُتَارْ

قَالْ لَيَّ الجَمَلْ يَا سِيدِى أَرْخِي رِسَينِي
وانَا عَارْفَ الطَرِيقْ باللهِ مَا تْوَصِيـــــنِي
لَيْ أُمْ زَينْ الحَبِيبَه لَيكْ بَصَلْ في حِينِي
وإنْ بَطَّلتَ بُكْرَه السُوق عَصُر وَدِينِي

شكرا ليك ياسمسم على الترحاب وليك السبق فى بناء اول راكوبه للنم والمسادير وراكوبتك زينه وقهوتها محوقه ومساديرك مولعه.. تحياتى..

انا جريت عنقريبى الهبابى
تحت الشجرة ام مسكا صابى
بدور اعاين واقعد فراجى
فى جمال المسدار وكلام البادى


عاد ما بخبروك و انت سيد الخبرة
معلوم يا الحبيب القصد والفكرة ؟
بالنضم البخلى جروح قلوبنا بتبري
نزّكر بلادنا وطيب جلوسنا الزكرى
يحن قلبى وامسح من عيونى العبرة
يا ود الكرام ..... نهديك سلام وموده
يا زولنا الظريف بين الحضور كالورده
انسابت حروفك ... عـسل لذيذ يا فـرده
وكلنا هنا أحـباب وحبل الوصال ممتده

واتفضل معانا ياود الصديق راكوبتنا مفروشه رمله ومرشوشه وقهوتنا بهبهانا
وده مسدارنا
واحدين فى البيوت بى ديك جداد رضوهن
واحدين بالخلاء والفيافى نفوهن
بلد الانجليزعقبنو ماشافوهن
وقفن زومه ياطه العليقات جوهن

عمارك لى خراب والفرحة فيك لى كربة
إسمك من الست الفانيه دار الغربة
اولك المعيشة جرى وتعب فى هربه
والتانية الامل والتالتة دفن التربة


كم حطمتى راجلاً فى مشيهو مشلق
صبحتيه بى حبل النكد متعلق
دربك لى البصابحك بى عجل بيزلق
ياصقر القبور الفوقنا ديمة محلق

الليل الناس كلها مرتاحة مافى زول جا اخد ليهو إنتكاية فى الراكوبة

تعصرى على البريدك وتقربى تآنسيه
يترك طاعة الخالق يكون ناسيه
بى توب سحرك البعمى القلب تكسيه
يصبح محتضر فى تربته تمسيه
سورك مابتم تابعاه ديمة الفجعة
ظاهرك لينا سكر إلاطعمك وجعه
كم طفشتى مرتاح قلبو مابى البخعه
روحو تشابى وإنتى قطعتى خط الرجعه

أها بنـات الفريق جاكم كلام
أخوان الرجال معاكم سلام
الحرف والزود من الاعماق وئـام
ياخيمة تجمع كل الأحبة كرام
بهطل وارف زان واستقـام
ليكم المني والدعوات سلام

مسدار القشاش:
يالزام تقايلي وفوكا يوت متسدر[
مخبور آبتعايفني ان أجيك مجدر
الدود آ بيبقى ضبعة والوريل مابلدر
تجي في القسمة يابسة ومن نداك تخدر.

عندما سمع الحاردلو بظهور شاعر مسادير اسمه ودالرضى ارسل لهمرابيع مسدار ليشرحها له ويعرف معانيها حتى يعترف به وهى
سبسب وانقلد فى ليالى الصيف******* لاموج لابحر لاشتاء لاصيف
زولا واحدحريف ولطيف ******* الملائد العشره حراتو يعمل كيف
فرد عليه ود الرضى وقبل التحدى
شعرك بعرفو لكن معاهو غتاته ***** وشعر البنات مابوصفوه بحراته
السبسب وانقلدديس المبروعه من اماته**** والملايد العشره اصابع المشاطه
وقيل ان الحاردلو اعجب به وبشرحه لمرابيعه