بري تحت ضل المطبخ الحوش مرشوش والخشبات ديلك فوق راسنا وكباية الشاي بالنعناع اياها وأنت بتسمعني بت الخير والله صوتك بيها بيرن في أضاني.
بت الخير يجيك الخير
وصل جوابك الكاتباهو للولد الحتالي
وكان الظن ترسلي ليه هين هينين من البركاوي
داك الطعمو حالي
ولو بالقل شخاليب دوم
وهنا والله ني ومسيخ وغالي
سؤالك يمة عن حالي
كان شفتيه يغنيك عن سؤالي
انا اتوكرت في قلب البنادر
زي غريق شرقان مدلدل في الدوالي
جات شايلاني حرّة جوف
انا اتحديت مجالا مومجالي
مصايب الجامعة اكبر من جميع الشفتو
ولا سمعتو في ايام الخوالي
قعاد الكرسي كان شفتيهو
ورم ساقي زي سيد الزلالي
اقلب في الدفاتر من صباحا بدري
لامن تمسي ما بنسي انشغالي
اسوق الليل تحت ضوء الكهارب
وديمة هارب من فراشي
وهادو حالي
ده كلو عشان اجيب نمرا
انافس بيها واستر بيها حالي
وعاد والله حالة ما بتسر البال
ومن يوم ما ابتديت ما انسر بالي
سلاطين العلم يايمة
ينسوا العشرة في فد يوم
يدفروك بره زي دفر الطبالي
وخايف من اجيك مرفود
وهادي الفكرة من ما جيت
معشعشه في خيالي
وخايف تنبهل قربي الملانة
وينكسر سرجي وكمان تطفش جمالي
واخير افتح اضانك
قبل ما تلقي فوق اضني
ملويات حبالي
وكان حصل القدر يايمة لا تلوموني
ذنبي علي البنادر نورا اقوي علي احتمالي
بناتا فيها رويانات جسومن بالدهون
تلصف بلا جلود السحالي
كتوفن ما بقول عكف السروج
لكن بشوف فوقن مخالي
سبيبن ديمة بالحزم الكبار مبهول مردم
فوق قفاهن..وا حلالي
صدورن طامحة زي موية الدميري
الهايجي تكشح في العوالي
عيونن واسعة تبلع مية
زي ولدك تشرك للموحد والضلالي
وحاتك ضُمّه ما بقدر عليهن
ساعة اقيف قدامن
انكس راسي بي قدري وجلالي
مشيهن سوا زي سرب الغزال
لكن نفورن مو غزالي
عدادن مابخبرو
الا وين ما امشي الاقاهن قبالي
وقصاصن ينقّر بي عصاتو
ومايفرّق دربهن
من بين دريبات القماري
بخورن في سماء البندر
يدوخ متل مسك العشاري
رقيصن ينهزنو بلا الفلو
الّلماتو غابن منو في ضل الضهاري
يجمّع في قفاهو وينطرح
يتمطّى تتحتحت مفاصلو
وده ياهو الفاك جباري
دلالكين تجيب الضلّ
في متاهات الضهاري
غناين اصلو ما سمعنابو
كنت بقول ليكي الا هسع ما ني طاري
وطنبورن مبرقع وحسو فاقع
لا في كنتر لا ودع فوقو بيراري
عشوقن في الرقيص
يتلوي زي سيد المغص
يوم يبقي في حالة طوارئ
والمداين ديمة فايري
زي وحوشا في البراري
والمـآسي كتيرة حاصلة
والمكضب يلاقي بوليس السواري
عاد دي حالتا بقدر اتستر معاها
خلاف احاكي الناس واجاري؟
وانتو راجين يوم اجيكم بشهادتي
وينبسط اهلي وكباري
وبرضو خايفين من اجيكم بي غريبة
وفي خجل قايد صغاري
والقدر بي غادي كاتب ليه شيتا
لاني حاري ولا ني طاري
حاجة واحدة تكون في علمك
اني جايي وتاني راجع لي دياري
وياني حمّيد القديم
الا بس فاقد حجابي وراح سواري
يمة كتري من رضاكي
وسلميلي علي المعاكي
سلميلي علي جروفنا وحتى وزينا البكاكي
وقولي لي حبوبة زيك
نحن شبنا وماك براكي
وكان سألتو أنا حالتي عايمي
لاني ضاحك و لاني باكي
سلميلي علي بناتنا
وقولي ليهن ماني ناسي
طاري شلاخا مواسي
زي شقوق بيتاً سداسي
طاري نقشا فوق خدودن
بين ضفايرو وشوفو قاسي
جسمي في البندر ممدد الا بينكم بي حواسي
سلميلي علي البكادن والبشتت في التقاوي
في الكرد محراتو قالع
وصوتو فوق تيرانو عاوي
ماحزم بقجة هدومو وقام فجر لاحق اللواري
اخيرلو يحفر في جداولو
مالو مال حفر المجاري
سلميلي علي الضرايح
والفضل من الخلاوي
والفقير الفوق حصبرو
يكتب البخرة ويداوي
مع السلامة ودعتك الله
لي شفقتك مافي داعي
ولي وصيتك ماني ناسي
وابقي عشرة الراعي واعي
في بحور اهل البنادر من زمن طالق شراعي
كان نجحت بجيك غانم
وكان فشلت بجيك ضراعي.
سلام لكل نفس طالع ونازل فيك ياالبلد علي قدر ماحاسةاني فرحانة علي قدر ماحسيت طعم الغربة الحنضل بعد لمتنا بيكم شوفوا لينا حل؟
وان شاء الله يهون اللقاء قريب يارب.
.
ولا زينوبة اخرت ايدى فى الدنيا ام بناينا قش الأربعاء أكتوبر 20, 2010 8:29 am