هام وعاجل إلى كل واحدة من بنات حواء مسجلة فى المنتدى

بسم الله الرحمن الرحيم
اخواتى العزيزات ذوات العضوية بهذا المنتدى
السلام عليكم ورحمة الله وبركاته
الحكاية شنو يابنات ماهذا الصمت الرهيب المهيب ؟ ام هو الهدؤ الذى يسبق العاصفة ؟
تقريباً كل المشاركات فى المنتدى مقصورة على الرجال فقط
دايرين تفاعل نسائى ,مواضيع حية اكيييد عندكن الكثييير المفيد ,ماتخلو الساحة للجماعة ديل براهم ,طيب فايدة العضوية شنو لو ماكل واحدة شاركت برأيها لو الاطلاع على مواضيع المنتدى بس كفاية ماكان فى داعى للتسجيل ممكن تكونو زوار فقط وتقرو المواضيع الفى المنتدى .
شدو حيلكم ياام مؤيد ,خالة عبودى ,صفية ازهرى ووصال المسجلة اخيراً وليس آخراً
حضوركم ووجودكم يفرحنا ويسعدنا

ازيكم يااهل طيبة الطيبه قريتنا الحبيبه وكل سنه وانتو طيبين وربنا يعلى مراتبكم اولا اتشرف بان انضم كعضوه مساهمه انشاء الله فى منتداكم العامر بابناء طيبه ثانيا ارسل كل الامتنان للقائمين على امر المنتدى لاظهارهم اسم قريتنا الحبيبه عبر منتداهم على الشبكه العنكبوتيه الانترنت وتقوية اواصر العلاقات والتواصل لابناء طيبه الحبيبه مع بعضهم البعض وجعلهم لصفحة المنتدى مصدر ثقافه ومعرفه للزائرين
وكلنا نعلم ان للاوطان فى دم كل حر يد سلفت ودين مستحق

تحيه خاصه لاختنا سميه وبمناسبة رسالتك لبنات حواء بالمنتدى بعد ان قراءتها سالت نفسى مرات ومرات انتى سميه بنت منو فى طيبه لاننى والله سعدت بمعرفة عدد من ابناء طيبه بالمنتدى لكنى لم استطع معرفتك بالاسم فقط وحتى تكتمل معرفتنا ابادر واكتب اسمى مكتمل وصال مالك واتمنى ان تكون الاسماء مكتمله حتى نكون اسره واحده

سلام واحترام ياحاتم عرقله بما انى حركت فيكم اشجان الزمن الجميل زمن الكوكبه النشطه الاستاذ اباذر على واخوته الكرام بدر بخاطرى سؤال مباح لماذا اختفت التجمعات الجميله كرابطة ابناء طيبه شباب وشابات والانشطه المفيده وطيبه ملئيه بالشباب من الجنسين والقرية فى اشد الحوجه لاسهامات شبابها فى ترقيتها وانمائها السؤال لك ولجميع شباب طيبه بالمنتدى

تحياتى يااحمد وكل عام وانت بخير وربنا يديك الفى مرادك وشكرى وامتنانى لك لحسن الاستقبال وان شاء الله دائما منور المنتدى بمساهماتك ( شايفاك مجنن ناس المنتدى جن )

تحياتى ليك ياسميه واشكرك جدا على ردك وانتى والله بنت طيبه ميه الميه بما انك بنت خالة معتز كدينه ( لك التحيه يامعتز ود صفيه بت الخاله الفاضله اسيا )يعنى انتى بت اختنا نوال بت خالتنا اسيا لو تعريفى ليك صحيح .. يابت انتى بت طيبه ونص وعشره ماتسمعى الجماعه انك مامن طيبه ..اقومو يحقرو بيك اقيفى قدام الصف وامسكى علم طيبه وهم يقيفو وراك وشكرا يامعتز لانك قربت لى المسافه وطوالى عرفت البنيه ..تحياتى واحترامى للولد وبت خالته..

السلام عليكم ياابننا محمد ابوصباح ود اختنا الفاضله صفيه بت عبدالله ود الفكى تحيه واحترام والله ماشاءالله عليك لما قرات اسمك يتصدر اعضاء المنتدى والقائمين على امره مر شريط ذكريات جميل مع والدتك الفاضله اختنا صفيه الف رحمه ونور عليهاوهى تشكو من شغبكم وازعاجكم وانتو صغار ولكنها تتراجع وتقول بكره يكبرو ويعقلو والحمدلله يامحمد كبرتو وعقلتو وبقيتو اساتذه فى الكمبيوتر ربنا يحفظكم ..واظنك لاتحتاج لاوصيك بالدعوات والصدقات لوالدتك الفاضله صفيه وتحياتى لاخواتنا عاتكه وكوثر وزينب وجميع الاسره الكريمه..