اصطفيت جرحك !!!!!!!!!

وإصطفيت جرحك براك
وتر إنتباهك والنغم
ضفة تزرع في الشروق
وضفة بتقاوم الألم
شمعة الأمل التهِد ليل الكوابيس
زمن الودار
شامخة بتعاند في صدى الليل
الهياج الاحتضار
صاح إنتباهك في الزمن
لما أصطفاك
قدر العصافير الرحيل
غدر الشِباك شوك المتاهات الدوار
تحتك نسيج الليل طويل
الأناشيد الماخدة من حـِزم الشعاع
نار البدايات البتول
للسحابات التلوح قوس قزح
بشرة هطول
ولي ضِيا القمر المقرّح
ضد قوانين الأفول
ليك يا أخر الخيول
فرس الرِهان الما كبا
وهج الشموس الاشتعال
وانكسار المستحيل
شقيتو بي سيل الحروف
الطالعة دابا من الصدف مجرى البحر
تيارو والموج الرجوع
أديتو حيل مدو الزمان كان إنحسر
غيرت في الزمن الملامح
طعم الكلام لون الغنا
وطبع البذور كيميا التراب
طقس المطر
صاح إنتباهك في المكان
زهو السنابل بالقموح
وإجتراحك لي لسان لغة الجموح
وكتين يتوه بين السكات
وسيف القيود الارتهان
شمس الحقيقة الـ آه
بقت منفي ونزوح
وأقتباسك للصبر لغة اليقين
بانقسامك في الزمن
وإنصهارك
واقتسام الآهة بينك والمحن
وانتصارك لي صباحاً بكرة طالع
من مدارات الصهيل
يا صباحك
لما تنداح ضفة جراحك بالشجن
وتقلد الزمن العديل
يا جراحك
لما تفرد غيم جناحك
فوق عذابات الوطن