نصائح ام سودانية لابنتها
يا بت هوي فتحي عينك و ابقي نجيضة وفالحة..... قدر ما اجي داخله عليكم القاكي .... هي هي هي .... و قر قر قر ..... تضحكي مع عبد الله دا....
الراجل ما تضحكي ليو كتير..... يسعالني الله، يحقر بيك....الراجل اديهو
العين الحمرا. وان قدرك الله ايدك تلحقيها ليهو لحقيها...ابقي نجيضة.....آآي..... زي امك.....الله بسعلني وقت ابوكي يقول حاجة تضحك.... امشي اتحشر في الاوضة واضحك زيييين واجي مارقة صارة وشي.... وبعدين اوعك واوعك وبعدين تااااني اوعك... تقولي ليو الجلابية دي سمحة ولا العمه اللابسها دي سمحة... نفسو تقوم تعجبو يعرس فوقك.... وبعدين تشربي ما تروي....واكربيهو بالطلبات.... اوعك تخلي ليو قرش يبيت في جيبو...واوعك تخليهو يشوف المسلسلات...... بيخربن الرجال... و وقت المسلسل داك يبدأ شفتي جيبي فندكك واقعدي دقي أي حاجة جنبو ويا ريت لوكانت شطة... ولا كان شافعك جيعان وداير يرضع ويبكي خليهو في بكاءهو داك لمن المسلسل ينتهي.... وبعدين ما يجى داخل يلقاكى تغنى حتى ان بقيتي دايرة تغني اوعك من الغنا الخايس ناس حبيبي حبيبي.... امسكي في الغنا الحار زي البيجري نسيبتو و مرتو طلقانة ولا اندب حظي ولا دفاعنا الشعبي ياهو ديل ولا النار ولعت بقلبي بطفيها.....اااااااااااي.... عشان تربي فيو الخوفة .....والخلعة....بس اوعك تغني ليو الليلة يوم الرجال.... بيقوم يصدق و يتحنفش فوقك ساكت........ واوعك تشكري ليو حاجة جابها.... ان جاب ليك لحم ختي ايدك فوق راسك وقولي ليو ووب علي ووب علي ووووب علي غشوك وادوك الجلافيط.....وان جاب ليك فتيل ريحة اول ما تفتحيها وتشميها طوالي صرى وشك وقبلي غادي وابزغي وقولي ليو دا شنو يا عبدالله؟......الريحة المتل ريحة الفسيخ دي جايبها من وين؟ غايتو انت مغستك تشق....... وان جنك نسوان ولا بنات....ما تخليهو يقعد وسطن....ويتونس.... طيريهو من البيت....وان ابى يمرق... قدرمايقول ليو نكته ولا يخفف دمو قدامن صري ليهو وشك.... وقولي ليو انت يا عبد الله ما عندك غير النكتة دي؟ يا خي عملت لنا بها وجع وش......اصلهم الرجال عارفاهم... الواحد فيهم من يشوف ليو لمت بنات يقعد يخفف في دمو ويعمل فيها ودنفاش.....وتلقيهو يضحك بلا سبب... حتى ان واحدة قحت ساكت ... يقعد يضحك ويصفق اديهو....واوعك تخليهو معاهن وتدخلي المطبخ تسوي ليك شربات .....وحات الله بنات الزمن دا ان غفلت من راجلك دقيقة بس تلقيها عرستو... ااااااى... اسمعى كلام امك يا بت حشاى .. امك دايرة مصلحتك .. ااااى !!!
